نشرت في:
السبت، 27 أبريل 2013
نشرت بواسطت
صقر الاسماعيلية
قصيدة(كنت فاكره) بقلم الشاعره:هدي نور
كنت فاكره
الناي لوحده
شكل ملامح الحزن جوه صوته
وان عصفور الكناريا
على كف الفضا
بيلبي غنوة فرح
وان التضاد مابينهم
اتحد
في عشق المعاني م الخيال
وان الفرق بين الحلم والعلم
صدق النفوس
واختصار الوقت ف انك تلف ف الدوران
فيطلع ضل خفي
يكشف سرك الملعون
فتضيع ملامحك ف الندم
ليه
كل شئ اتبدل
ولبس توب الانا
بيقولوا بعض الجراح بتتساوى
لو حبة رضا جواك
وانا لسه جويا نور بيحضني
عمره ما تهز لحظه
ولا ا شتكى من الوجع
مع انه شكل ملامحي
والبنت اللي لسه جوايا من كام سنه
بتجدل ضفايرها
بيتردد صدى صوتها
وتدفعني
اغربل الوقت اللي عدى ع كف الانين
لقتني بخجل
ويترد صوتي م الالم
وانا بفتح صناديق العجب
بدور على ضحكه
تكون عدِّت
وصحبه تكون لمت
حنين الود ف قلوبها
لقتني بجمع الاصفار
واللي باقي مني
حبة حب خايبه
بفلسفهم
واقلبهم
ف حروف قصيده مبهمه
بمليون سؤال
ليه الشمس لحظة طلوعها
بتفرط الضوء بنكهه خصام
وابتسام الفجرشبح
قبل ماتلمحه يضيع قوام
ويسالني الصنم علتي
اقولو هنا؟؟
دامت الاحزان
وتخدني غفوه بعد البكى
وانسى وهمي ف الاحلام
هدي نور