المستشار:محمدصقر

يا جماعه احنا بنطالب كتير الغرب بعدم التدخل بس طول ما احنا بلد مش عارفه حجمها وعمالين نقسم في بعض لفلول واخوان وغيرهم ولسه التقسيم شغال ميدخلوش ليه ما بينا مش الغرب دول من ضمن مبادئهم (( فرق تسد )) طيب اهم نجحوا في التقسيم والتفريق ميتدخلوش ليه بقي ويشغلوا عقولهم وينتهزوا الفرصه

العيب مش علي الدويلات دي العيب عندنا احنا اللي بنديهم الفرصه كامله للتدخل لأننا مبنتعلمش من تاريخنا سواء علي المستوي المصري ولا العربي مبنتعلمش ان لو اتوحدنا مره كمصريين وعرب ممكن نعمل في الدويلات دي ايه ده احنا ممكن نمحيهم من علي وجه الارض وبسهوله زي ما بايدينا احنا الدويلات دي كبرت بسهوله للاسف بسبب اختلافنا وانقسامتنا بقي ليهم حجم وقوه احنا نختلف ونتقسم ونضعف من كيانا وهما يتوحدوا ويبقوا قوه عظمي

شوفتوا انتمائنا للاشخاص عمل فينا ايه يا مصريين بقينا فلول وبقينا اخوان وليبراليين وعلمانيين .... وغيره وكل فريق من دول ليه مؤيديه ومعارضيه شوفتوا التقسيمه وسعت ازاي ؟

انما لو كان انتمائنا الوحيد لمصر مصر وبس كنا هنلاقي مؤيد ومعارض بردو معتقدش الا بقي لو بينا خونه وساعتها بردو هنبقي كلنا واحد لأن الخاين مش هيبقي له مكان بيننا

مسألناش نفسنا سؤال اخرتها ايه ؟ مسألناش نفسنا سؤال احنا افترقنا واتقسمنا كده علشان خاطر مين وايه النتيجه اللي هنجنيها في الاخر من ورا الاختلاف ده ؟ طيب احنا بندمر في بلدنا دلوقتي ذنب بقي ولادنا اللي هييجوا في المستقبل ايه في خراب البلد اللي هيورثوه عننا هو ده اللي احنا هنورثه ليهم الكره والتفرقه والخصام والدمار لأ والله احنا متعلمناش كده من ابائنا وجدودنا علشان نعلمه لولادنا حرااااام والله اللي هنعمله فيهم

تعالوا يانتمائنا لمصر بس نبنيها لولادنا من جديد  مصر هي اللي باقيه والحكم مش باقي لحد تعالوا نتوحد علشان نبقي قوه عظمي في المنطقه والعالم كله ومنسمحش لدويلات عديمه الجذور والحضارات دويلات متطفله انها تتحكم في دول بحجمنا كفايه بقي مشاحنه وصراع وتخوين وتربص لبعضنا عيب عيب اوي والله

طول ما ايدي في ايدك وطول ما هدفنا وانتمائنا لحاجه واحده وبس وهي ( مــــصــــر ) هنبنيها وتبقي احسن بلد في الدنيا ان شاء الله

بسم الله الرحمن الرحيم (( ولا تنازعوا فتفشلوا وتذهب ريحكم واصبروا ان الله مع الصابرين ))

(( واعتصموا بحبل الله جميعا ولا تفرقوا واذكروا نعمة الله عليكم إذ كنتم أعداء فألف بين قلوبكم فأصبحتم بنعمته إخوانا وكنتم على شفا حفرة من النار فأنقذكم منها كذلك يبين الله لكم آياته لعلكم تهتدون )) صدق الله العظيم

اللهم اني قد بلغت اللهم فاشهد .